නූතන ගෝලීය ශ්රම වෙළඳපොල, පුහුණු ශ්රී ලාංකිකයන්ගෙන් පිරවීම අපේ අරමුණයි
මාධ්‍ය නිවේදනය
“නූතන ගෝලීය ශ්රම වෙළඳපොල, පුහුණු ශ්රී ලාංකිකයන්ගෙන් පිරවීම අපේ අරමුණයි“
– කම්කරු නියෝජ්‍ය ඇමති මහින්ද ජයසිංහ –
ලෝක ශ්රම වෙළඳපොළට ගැලපෙන පරිදි පුහුණු ශ්‍රමිකයන් වැඩි වශයෙන් නිර්මාණය කිරීම රජයේ අභිලාෂය බව කම්කරු නියෝජ්‍ය අමාත්‍ය මහින්ද ජයසිංහ මහතා පවසයි. ඒ මහතා පෙන්වා දෙන්නේ ඒ මගින් ජාතික ආර්ථිකය ශක්තිමත් කිරීම සඳහා අති විශාල විදේශ විනිමයක් උපයා ගත හැකි බවයි.
කම්කරු නියෝජ්‍ය අමාත්‍ය මහින්ද ජයසිංහ මහතා මේ බව ප්‍රකාශ කළේ සෞදි අරාබියේ රියාද් අගනුවරදී අදින් අවසන් වන ගෝලිය ශ්රම වෙළඳපළ සමුළුව අතරතුර මෙරට මාධ්‍ය වෙත අදහස් දක්වමින්..
එහිදී තවදුරටත් කරුණු පැහැදිළි කළ කම්කරු නියෝජ්‍ය අමාත්‍යවරයා සඳහන් කළේ සෞදි අරාබියේ රැකියා කාණ්ඩ 23ක් සඳහා විදෙස් ශ්‍රමිකයින් බඳවා ගන්න බවයි. කෙසේවෙතත් ශ්රී ලංකාවෙන් ශ්‍රමිකයන් යොමුවන්නේ රැකියා කාණ්ඩ 6ක් සඳහා පමණක් බවද ඒ මහතා පෙන්වා දුන්නා.
මේ එහිදී වැඩිදුරටත් අදහස් දැක්වූ කම්කරු නියෝජ්‍ය අමාත්‍ය මහින්ද ජයසිංහ මහතා.
“මාලිමා රජයේ “පොහොසත් රටක් ! ලස්සන ජීවිතයක් ” යන තේමාවට අනුගත වෙමින් දුප්පත්කම තුරන් කරලීම සඳහා ලෝක ශ්රම වෙළඳපළ අපට හොඳ අවස්ථාවක් නිර්මාණය කරදී තිබෙනවා. අපේ රටේ සිටින පවුල් ලක්ෂ 64න් පවුල් ලක්ෂ 24ක් දුප්පත්භාවයේ සිටින්නෙ. එම දුප්පත් පවුල්වලින් ලෝක ශ්රම වෙළඳපළට අවශ්‍ය පුහුණු ශ්‍රමිකයන් නිර්මාණය කර ගත්තොත් ඒක මෙරට දුගීබව තුරන් කරන්න හොඳ පිටිවහලක් වේවි. ඒ හරහා ජාතික ආර්ථිකයද ශක්තිමත් කරගැනීමට අපට හැකියාව තිබෙනවා.”
ගෝලීය ශ්රම වෙළඳපළ සමුළුව සෞදි අරාබියේ රියාද් අගනුවරදී අති උත්කර්ෂවත් ලෙස ඊයේ (29) ආරම්භ වුණා..
ඒ සෞදි අරාබි රාජධානියේ නායක සල්මාන් බින් අබ්දුල්ලසිස් අල් සවුද් රජුගේ ප්‍රධානත්වයෙන්.
මෙම සහභාගීවීම සඳහා ශ්රී ලංකාව නියෝජනය කරමින් දිවයිනෙන් පිටත්ව ගියේ කම්කරු නියෝජ්‍ය අමාත්‍ය මහින්ද ජයසිංහ මහතායි
ඊට රටවල් රැසක විෂයභාර අමාත්‍යවරුන් මෙන්ම කම්කරු නායකයන්, ප්‍රධාන පෙළේ ව්‍යාපාරිකයන් රැසක් සහ ප්‍රතිපත්ති සම්පාදකයින් එක්ව සිටීම විශේෂත්වයක්.
මෙම සමුළුවට මේ වනවිට 5000කට වැඩි පිරිසක් සහභාගී වන අතර කථිකයන් 180දෙනෙකු මෙන්ම ලොව කම්කරු අමාත්‍යවරුන් 70කට වැඩි දෙනෙක් සහභාගී වුණා.
මෙම ලෝක ශ්රම වෙලඳපළ සමුළුවේදී ලෝක ශ්රම වෙළඳපළේ නූතන ප්‍රවණතා,ජාතික ප්‍රතිපත්ති මෙන්ම ඒ ඒ රටවල ආර්ථික තත්වයන් පිළිබඳවද අවධානය යොමු කෙරෙනවා.
ඊට අමතරව ශ්රම වෙළඳපළේ වත්මන් අභියෝග, වැටුප් විෂමතා, තරුණ සේවා නියුක්තය ආදී කරුණු පිලිබඳවද සාකච්ඡාවට බඳුන් කෙරුණා.
ස්තූතියි,
පුවතට අදාළ වීඩියෝ පට සහ ඡායාරූප මේ සමග යොමු කරමි
.