පුවත්

ආගමන ශ්‍රම සංක්‍රමණ ජාතික ප්‍රතිපත්තියක් සැකසීමේ කටයුතු අවසන් අදියරේ

2026 නොවැම්බර් 13 • පුවත්

ශ්‍රී ලංකාව සඳහා ආගමනික ශ්‍රම සංක්‍රමණ ප්‍රතිපත්තියක් සකස් කිරීම සඳහා අමාත්‍ය මණ්ඩල අනුමැතියෙන් කම්කරු අමාත්‍යාංශ ලේකම්වරයාගේ සභාපතිත්වයෙන් හා රාජ්‍ය ආයතනවල ජ්‍යේෂ්ඨ නිලධාරීන්ගෙන් සමන්විතව පත්කරන ලද කමිටුව විසින් මෙම නව ප්‍රතිපත්තිය සම්බන්ධයෙන් වාණිජ මණ්ඩල නියෝජිතයන් දැනුවත් කිරීම සහ ඔවුන්ගේ අදහස් හා යෝජනා ලබා ගැනීමේ විශේෂ සාකච්ඡාවක් පසුගියදා (10) පෙරවරුවේ නාරාහේන්පිට, මෙහෙවර පියෙස ගොඩනැගිල්ලේ පිහිටි කම්කරු අමාත්‍යාංශයේදී පැවැත්විණි. ඒ කම්කරු අමාත්‍යාංශයේ ලේකම් එස්. එම්. පියතිස්ස මහතාගේ ප්‍රධානත්වයෙනි.

සංක්‍රමණය සඳහා වන ජාත්‍යන්තර සංවිධානයේ (IOM) තාක්ෂණික සහාය ඇතිව සියලු පාර්ශ්වයන්ගේ අදහස් හා යෝජනා සැලකිල්ලට ගනිමින් සකස් කෙරෙන මෙම ප්‍රතිපත්තිය සකස් කිරීම මේ වන විට අවසන් අදියරයේ පවතින අතර ඒ සඳහා 2027 වසර ආරම්භයේදී අමාත්‍ය මණ්ඩල අනුමැතිය ලබා ගැනීමට අපේක්ෂිතය. 

වර්තමානයේ ශ්‍රී ලංකාවට විදේශීය ශ්‍රමිකයන් ගෙන්වා ගැනීම සඳහා අනුමැතිය ලබා දීමේ ක්‍රියාවලිය ආගමන හා විගමන දෙපාර්තමේන්තුව, ශ්‍රී ලංකා ආයෝජන මණ්ඩලය සහ කර්මාන්ත අමාත්‍යාංශය ඇතුළු ආයතන කිහිපයක් හරහා එකිනෙකට වෙන් වූ ක්‍රමවේද යටතේ ක්‍රියාත්මක වේ. මෙම ආයතන අතර ප්‍රමාණවත් ඒකාබද්ධතාවක් නොමැති වීම සහ මධ්‍යගත දත්ත පද්ධතියක් නොපැවතීම හේතුවෙන් මෙරට සැබෑ ශ්‍රම හිඟය නිවැරදිව හඳුනා ගැනීම, විදේශීය ශ්‍රමිකයන්ගේ අවශ්‍යතාව තක්සේරු කිරීම සහ ඔවුන් පිළිබඳ විධිමත් අධීක්ෂණයක් පවත්වාගෙන යාම අභියෝගයක් වී තිබේ. එමෙන්ම, නිසි නියාමනයකින් තොරව විදේශීය ශ්‍රමිකයන් මෙරට රැකියා සඳහා යොමු වීම දේශීය ශ්‍රමිකයන්ගේ රැකියා අවස්ථා හා සුරක්ෂිතතාව කෙරෙහි අහිතකර බලපෑම් ඇති කිරීමට ඉඩ පවතී. අනෙක් අතට, පවතින ක්‍රමවේදයේ අඩුපාඩු හේතුවෙන් මෙරටට පැමිණෙන විදේශීය ශ්‍රමිකයන් විවිධ ආකාරයේ සූරාකෑම්වලට ලක්වීමේ අවදානමක් ද පවතින අතර, එවැනි තත්ත්වයන් ජාත්‍යන්තර වශයෙන් ශ්‍රී ලංකාවේ කීර්තිනාමයට ද අහිතකර ලෙස බලපෑ හැකිය. මෙම ගැටලුවලට තිරසර විසඳුමක් ලබා දීම මෙම ඒකාබද්ධ ආගමන ශ්‍රම සංක්‍රමණ ප්‍රතිපත්තිය සකස් කිරීමේ අරමුණ වේ. 

මෙමගින් දේශීය ශ්‍රම වෙළෙඳපොළේ අවශ්‍යතා සහ විදේශීය ශ්‍රමිකයන්ගේ අයිතිවාසිකම් අතර සමබරතාවක් ඇති කරමින්, විනිවිදභාවයෙන් යුතු, වගවීම සහිත හා විධිමත් ශ්‍රම සංක්‍රමණ කළමනාකරණ ක්‍රමවේදයක් ස්ථාපිත කිරීමට අපේක්ෂා කෙරේ.



ඡායාරූප ගැලරිය

මෑතකාලීන පළකිරීම්

ප්‍රවේශ්‍යතාව දසුන සකසන්න
අකුරු ප්‍රමාණය
වර්ණ ප්‍රකාරය
හඬ කියවීම (Text-to-Speech)