පුවත්

කම්කරු ක්ෂේත්‍රයේ අන්‍යෝන්‍ය අවබෝධය සහ සහයෝගීතාව ශක්තිමත් කිරීමේ අරමුණින්, චීන මහජන සමූහාණ්ඩුවේ යුනාන් පළාත් වෘත්තීය සමිති සම්මේලනයේ (Yunnan Provincial Federation of Trade Unions) නියෝජිත පිරිසක් සහ කම්කරු අමාත්‍යාංශයේ නිලධාරීන් පිරිසක් අතර සාකච්ඡාවක් ඊයේ (2026.09.23) පෙරවරුවේදී නාරාහේන්පිට - මෙහෙවර පියෙස ගොඩනැගිල්ලෙහි පිහිටි අමාත්‍යාංශයේදී පැවැත්විණි.

ද්විපාර්ශ්වික සාකච්ඡාවලදී ත්‍රෛපාර්ශවිකත්වය (tripartism), සාමාජ කතිකා, කම්කරු සබඳතා සහ සේවක සුබසාධන සේවා සම්බන්ධයෙන් දෙපාර්ශ්වයේ අත්දැකීම් සහ ප්‍රායෝගික භාවිතයන් හුවමාරු කරගැනීම කෙරෙහි විශේෂ අවධානයක් යොමු විය. එමෙන්ම අන්‍යෝන්‍ය උනන්දුවක් සහිත ක්ෂේත්‍රයන්හි ඉදිරි සන්නිවේදනය, දැනුම හුවමාරු කරගැනීම සහ සහයෝගීතාව වර්ධනය කරගැනීමේ මාර්ග පිළිබඳව ද මෙහිදී සාකච්ඡා කෙරිණි. මෙහිදී, කම්කරු ක්ෂේත්‍රයේ ආයතනික සබඳතා සහ සහයෝගීතාව තවදුරටත් ශක්තිමත් කරගැනීම සඳහා දෙපාර්ශ්වයේම ඇති කැපවීම පිළිඹිබු විය.

 මෙම සාකච්ඡාවල ඉදිරි පියවරක් ලෙස, ත්‍රෛපාර්ශවිකත්වය සහ කම්කරු ක්ෂේත්‍රයේ ක්‍රියාකාරකම් සම්බන්ධයෙන් දැනුම හුවමාරු කරගැනීම සහ ධාරිතා සංවර්ධනය සඳහා වන යෝජනාවලියක් ඉදිරිපත් කිරීමට චීන පාරශවය එකඟ විය. මෙම යෝජිත සහයෝගීතා ක්ෂේත්‍ර, ශ්‍රී ලංකාව සහ යුනාන් පළාතේ අදාළ ආයතන අතර ඉදිරි සබඳතා පවත්වාගෙන යාමට සහ අන්‍යෝන්‍ය වශයෙන් වාසිදායක වැඩසටහන් දියත් කිරීමට පදනමක් වනු ඇතැයි අපේක්ෂා කෙරේ.

කම්කරු අමාත්‍යාංශයේ ලේකම් එස්. එම්. පියතිස්ස මහතා ඇතුළු අමාත්‍යාංශයේ ජ්‍යෙෂ්ඨ නිලධාරීන් පිරිසක් අමාත්‍යාංශය වෙනුවෙන් මෙම අවස්ථාවට එක්ව සිටියහ.

"